Þökk sé velvilja, þátttöku þjóðarinnar og metnaðarfullu starfsfólki þá einkenndist þetta 42. starfsár Rannsóknarstöðvar Hjartaverndar eins og fyrri ár af ötulu rannsóknarstarfi.

Árangur starfsemi Rannsóknarstöðvar Hjartaverndar árið 2010 var glæsilegur. Alls birtust 45 vísindagreinar byggðar á gögnum Hjartaverndar á árinu og fjöldi þeirra í virtustu tímaritum samtímans eins og Nature Genetics, Nature, Lancet, JAMA og BMJ. Vísindamenn Hjartaverndar kynntu niðurstöður rannsóknanna heima og erlendis auk þess sem forstöðulæknir Hjartaverndar hélt boðsfyrirlestra víða erlendis.

Í tengslum við hina miklu rannsóknarvirkni á árinu komu margrir erlendir vísindamenn til fundar og vinnu við rannsóknarstöðina ásamt því að fjölmargir nemar í framhaldsnámi unnu rannsóknarverkefni tengd Hjartavernd. Blómlegt samstarf við innlenda og erlenda háskóla jókst og ber þar hæst samstarf okkar við Cambridge-háskóla á Englandi og Johns Hopkins-háskólann í Baltimore í Bandaríkjunum.

Til þess að halda gangandi öflugu rannsóknarstarfi Hjartaverndar þarf mikið fé og framúrskarandi vísindamenn enda er samkeppnin hörð jafnt innanlands sem utan. Hjartavernd hefur hingað til fengið fjölmarga stóra styrki, m.a. Öndvegisstyrk Rannís, kr. 75 milljónir sem skiptast milli 3ja ára. Sá styrkur er notaður til þess að þróa og beita myndgreiningaraðferð til að meta þróun æðakölkunar og auka skilning á hjarta og æðasjúkdómum. 

Þrátt fyrir að Rannsóknarstöð Hjartaverndar hafi náð framúrskarandi árangri í því að afla tekna til rannsóknarstarfsins þá er mikilvægt að allir geri sér grein fyrir því að það fé er eyrnamerkt til sérstakra rannsóknarverkefna og má ekki nota til annars en þess sem það var aflað til. Þetta þýðir að Hjartavernd þarf einnig að afla fjármagns til að geta sinnt fræðslustarfsemi, þ.e.a.s. til þess að koma upplýsingum rannsóknarniðurstaðna á framfæri við stjórnvöld og almenning þannig að nýta megi niðurstöður rannsóknanna til þess sem er ætlast eða í í baráttunni við hina ýmsu sjúkdómum. Hingað til hefur almenningur verið ötull í að styðja vel við bakið á starfsemi Hjartaverndar og var árið 2010 enginn undantekning þar. Við starfsfólk Hjartaverndar þökkum því velunnurum okkar innilega fyrir veittan kærkomin stuðning.

Hægt er að nálgast Ársskýrslu Hjartaverndar í fullri lengd með því að smella hér