Forsíđa arrow Öldrunarrannsókn 1. áfangi
Öldrunarrannsókn

Öldrunarrannsóknin Hjartaverndar er nýjasti áfanginn í Hóprannsókn Hjartaverndar, sem hófst 1967.  Öldrunarrannsóknin er samstarfsverkefni Hjartaverndar og Bandaríska Heilbrigðisráðuneytisins (National Institutes of Health).

Hverjir taka þátt í rannsókninni
Um það bil 15 þúsund einstaklingar á Íslandi sem tóku þátt í Hóprannsókn Hjartaverndar frá árinu 1967 og eru enn á lífi, er boðið að taka þátt í Öldrunarrannsókninni.  Með því að bjóða þátttakendum úr fyrri rannsóknum að taka þátt í rannsókninni, þá verður búið að safna gögnum um viðkomandi einstaklinga yfir meginhluta ævi þeirra þannig að hægt verður að sjá hvernig fólk eldist, þ.e. hvað það er í líkamsstarfseminni sem breytist við öldrun.

 

Markmið Öldrunarrannsóknarinnar

Markmið rannsóknarinnar er að kanna heilbrigði öldrunar og reyna að finna út hvaða þættir það eru í umhverfi, erfðum og líkamsástandi fólks sem hafa áhrif á heilsu þess á efri árum.  Vonast er til að rannsóknin gefi upplýsingar um samband á milli mælanlegra þátta snemma á ævinni og þróun sjúkdóma á efri árum og þá ekki síst við heilbrigði öldrunar.

 

Framkvæmd rannsóknarinnar

Öldrunarrannsókn Hjartaverndar er viðamesta rannsókn sinnar tegundar sem gerð hefur verið í heiminum.  Þau líffærakerfi sem eru skoðuð eru:

         Heili

         Bein

         Vöðva og fitudreifing líkamans

         Hjarta og æðakerfi

Upplýsingabæklingur um Öldrunarrannsóknina er sendur öllum þeim sem eru boðaðir til þátttöku í rannsókninni. Þar er framkvæmd rannsóknarinnar nánar lýst.

 

Upplýsingarnar sem safnast í rannsókninni verða nýttar í almannaþágu.  Reynt verður að sjá hvort hægt er að koma í veg fyrir eða hægja á öldrunareinkennum.  Vonast er til að upplýsingarnar nýtist þannig að unnt verði að beita fyrirbyggjandi læknisfræði til að bæta heilsu og auka lífsgæði fólks á efri árum.


Þessi fyrsti áfangi Öldrunarrannsóknarinnar hófst í september 2002 og innköllun var hætt  janúar 2006.

Við starfsmenn Hjartaverndar sendum öllum þátttakendum Öldrunarannsóknarinnar okkar bestu þakkir fyrir þátttökuna og ekki síst fyrir hina einstöku velvild og hlýju sem við höfum fundið hjá gestum okkar.  Þetta hefur verið tímafrek rannsókn, en alls tóku 5764 einstaklingar þátt í henni og var hver þátttakandi að meðaltali hjá okkur um 9 klukkustundir í alls þremur heimsóknum.  Það voru alls 237 einstaklingar sem þáðu heimaheimsókn og 44 sem tóku þátt með því að gefa blóð.  Einnig viljum við þakka þeim 1000 aðstandendum sem svöruðu spurningum okkar.

Við hjá Hjartavernd vonumst til þess að þeir, sem eiga eftir að fá boðsbréf frá okkur, muni slást í hópinn og taka þátt í 2. áfanga Öldrunarrannsóknar Hjartaverndar, sem hófst 2007.