Forsíđa arrow Fréttir arrow Úthlutun úr Rannsóknasjóđi Háskóla Íslands og Háskólasjóđi Eimskipafélagsins.
Úthlutun úr Rannsóknasjóđi Háskóla Íslands og Háskólasjóđi Eimskipafélagsins.
Á dögunum voru veittar tuttugu og fjórar úthlutanir úr Háskólasjóði Eimskipafélags Íslands og Rannsóknasjóði HÍ. Þar hlaut Eric Sampene-Donktor doktorsnemandi við læknadeild, styrk fyrir verkefni sitt og er Vilmundur Guðnason, prófessor við Læknadeild og forstöðulæknir Hjartaverndar leiðbeinandi við verkefnið. Með því að takast á hendur leiðsögn Erics er Hjartavernd að uppfylla stefnu sína að styðja við einstaklinga í þróunarlöndum til marvissrar uppbyggingar forvarna langvinnra sjúkdóma í heimalöndum sínum. 
 
Verkefni Erics sem ber heitið Heilablóðfall í Gana: faraldsfræði, lífsgæði og samfélagsvitund - Stroke in Ghana: epidemiology, life quality and community awareness, fjallar eins og nafnið segir um heilablóðfall en það er önnur helsta dánarorsök í heiminum. Dauðsföll af völdum heilablóðfalls eru mikið vandamál í sunnanverðri Afríku.  Þrátt fyrir að heilablóðfall sé álitinn mjög alvarlegur sjúkdómur í Gana er nánast engar upplýsingar að hafa um  stöðu sjúkdómsins þar.  Þar að auki er lítil vitund í samfélaginu um heilablóðfall og það er talið eiga stóran þátt í hárri sjúkdóms- og dánartíðni af völdum þess í landinu. Í rannsókninni verður leitast við að takast á við þennan þekkingarskort með því að rannsaka 150 heilablóðfallssjúklinga ásamt samanburðarhópi. Upplýsingum verður safnað um þátttakendurna þar sem áherslan verður á áhættuþætti, spá um lífsgæði þeirra sem lifa af heilablóðfall, sýkingar og aðra þætti tengda sjúkdómnum.  Þar að auki verður gögnum safnað til þess að meta þekkingu ganíska samfélagsins á áhættuþáttum og viðvörunarmerkjum fyrir heilablóðfalli.
 
 
 
 
 
 
 
06/06/2012