Forsíða arrow Fréttir arrow Auknar dánarlíkur fólks með mígreni með áru
Auknar dánarlíkur fólks með mígreni með áru

Niðurstaða rannsóknar á vegum Hjartaverndar, unnin í samvinnu við Háskóla Íslands, National Institute of Aging og Uniformed Services University of the Health Sciences í BNA sýnir fram á að fólk á miðjum aldri sem þjáist af mígreni höfuðverkjum ásamt áru (þ.e. sjóntruflunum, svima og dofa sem eru undanfari mígrenikasts) deyr frekar vegna hjarta- og æðasjúkdóma en þeir sem ekki þjást af slíkum höfuðverk. Einstaklingar með mígreni án áru reyndust hins vegar ekki vera í aukinni áhættu.

Þetta er í fyrsta sinn sem niðurstöður hóprannsóknar með langtíma eftirfylgni sýna fram á þessi tengsl. Jafnframt styðja niðurstöðurnar nýlegar rannsóknir sem benda til tengsla milli mígrenis og þá sérstaklega mígrenis með áru og aukinna dánarlíkna vegna hjartasjúkdóma. Þessar auknu dánarlíkur eru þó umtalsvert minni en áhættan sem fylgir mikilvægustu áhættuþáttum hjarta og æðasjúkdóma eins og háþrýstingi, hækkuðum blóðfitum og reykingum. Niðurstöðurnar ber því að skoða í því samhengi þótt vissulega sé þetta skref til að skilja betur þróun og áhættu á kransæðasjúkdómi. Enn á eftir að rannsaka hvort meðferð sem leiðir til fækkunar mígrenikasta muni einnig leiða til minni áhættu á hjarta- og æðasjúkdómum hjá einstaklingum með mígreni með áru.

Niðurstöðurnar  voru birtar í vefútgáfu hins virta læknisfræðitímarits British Medical Journal (bmj.com) í dag miðvikudaginn 25. ágúst og byggja á Hóprannsókn Hjartaverndar á Reykjavíkursvæðinu frá 1967 til 2007. Rannsóknin leiddi jafnframt í ljós að einstaklingar með mígreni með áru eru í aukinni hættu á dauða vegna bæði kransæðasjúkdóma og heilablóðfalls og konur með mígreni með áru eru í aukinni hættu á dauða vegna annarra sjúkdóma en krabbameina og hjarta- og æðasjúkdóma.

Mígreni með og án áru var greint með spurningalista sem þátttakendur svöruðu á árunum 1967 til 1991. Þátttakendur, 18725 karlar og konur sem fædd voru á árunum milli 1907 og 1935, meðalaldur 53 ár (31-81 ár), voru spurðir út í ýmsa þætti sem tengjast hjarta- og æðasjúkdómum. Þá voru ýmsar klínískar mælingar gerðar svo sem blóðþrýstings- og blóðfitumælingar. Með þessu móti var hægt að meta dánarlíkur tengdar mígreni með og án áru á eftirfylgnitímanum og leiðrétta jafnframt fyrir áhrifum annarra áhættuþátta hjarta- og æðasjúkdóma. Meðaleftirfylgni fyrrnefndra 18725 þátttakenda var 26 ár sem gerir þessa rannsókn meðal umfangsmestu rannsókna sem framkvæmdar hafa verið.
Rannsóknina leiddu prófessor Vilmundur Guðnason forstöðulæknir Rannsóknarstöðvar Hjartaverndar og Lárus St. Guðmundsson faraldsfræðingur og doktorsnemi við Háskóla Íslands. Rannsóknin var styrkt af Rannsóknasjóði Háskóla Íslands og Hjartavernd.

Hér má sjá vefútgáfu BMJ um rannsóknina

 

sett inn 25.08.2010